عيد الأم!
أول عيد أم لنور!
طبعا لازم يكون مرتب و يوم مليان مفاجئات...
من بداية الأسبوع و أنا قاعد بفكر بالي بدي أعمله بعيد الأم باعتبار انو أول عيد أم لنور، و هلأ تقريبا صرت حاطط الخطوط العريضة...
مطعم صنوبر فكري أخد نور هناك و أحكيلها انو عشاء و خلص...طبعا هي أكيد راح تنبسط و هدا المهم...
بنتعشى العشا اللطيف مع ريان و بعديها بركي روحنا نتمشى شوي عل بحر لأنها بتحب تمشي عل كورنيش...و أصلا المطعم الو اطلالة عل بحر ...
بعد المشي بنرجع عل بيت و بتشوف الهدية و بصورها وقت ما تلاقيها...
لحد هلأ
ضايل بس أدبر فيلم هندي أخبي في الهدية...مممممممم
بدي أشتري الموبايل بكره ان شاء الله و بدي أطلعه معي عل بيت و بدي أشتري ورد منفول أحمر أول ما أروح من الدوام و بدي أدبر حجة اني أجيب أغراض للبيت فبحطه بكياس الأغراض و بطبيعة الحال أنا الي عادة برتب الأغراض بالتلاجة...و بدي أحطه فوق خزانة المطبخ نور ما بتوصل لفوق :)
و الهدية راح تضل فوق الخزانة ليوم الجمعة لحد ما نيجي بدنا نطلع عشان العشا ...بدي أنزل أنا و نور عل سيارة و بعدين أعمل حالي اني نسيت أجيب قنينة مية للشرب (و حتى لو كانت نور جايبة معها بدي أعمل حالي مو منتبه و ما بدي أعطيها فرصة تحكيلي انو معها مية بدي أطلع مباشرة عل بيت) فبدي أطلع فوق و أطول الموبايل من فوق الخزانة و أحطه على التخت بنص التخت و أحط حواليه الورد و بعدين أنزل عل سيارة و أنا معي قنينة المي و نطلع نتعشى و بس نروح بالليل بدي أحمل ريان و أجهز الكاميرا بدون ما تحس نور عشان أصورها لحظة ما تدخل عل غرفة و تشوف الموبايل :)
العشاء ✔
الهدية ✔
تخباية الهدية ✔
المفاجئة ✔
خلص هاي هية ...و في يوم الجمعة راح أفرجيها هاي البوست عشان تعرف اني مخطط للموضوع من زمان
و كل سنة و انتي سالمة ام ريان
و في يوم 21-03-2011 راح يوصلك كرت معايدة على ايكيل ان شاء الله :)
ملاحظة: الرجيم لسه شغال و دايما جوعان
ملاحظة 2: امي راح أبعتلها هدية مع نور بالصيف معبرة عن عيد الأم ان شاء الله :)
